معجز أم أجود

موضووع وصلني ع الايميل
ناااييس قريته وانا اضحك
خخخ
تفضلوا







مِعْجِزْ أم أجود

ما أدت ِلسلومْ داك اليوم وإلا ادفع الله البلاء ويش أقول لك، إلا رجايلي متحرولة عليِّ،إيه..من اللوبة له..وهم غير مبوبلين..عاد سويت لقمة هالعشاء ونجبته للمجبوبين أولادي وما يجوز ليهم شــــي، يطلعوامن المغرب المهجومين وما يرجعوا إلا اظهر انهار يوم فاني، عاد انهجموا انبطنوا وطاروا لصبيانهم.
يوم برزت من غسال لماعين اتبهتت عافيتي عليِّ، قلت عاد ماني منحسة خامة الحوي ،قلت باخليه لباجر..إيه..
عاد قعدت لا بروحي والبيت صاير وُحْشْ عليِّ، قلت با هيد شوي من هالطحنة طول لنهار، وحيفني غافية عيوني ،وإلا ادفع الله البلاء حس مشادخ في الحوي وناس تردح..قمت عاد شرفت من لدريشة ,إلا الأمان بك ياربي أربعة اصناوى يطفروا في الحوي كنهم اِسْمِلاَّ وبِلاّ ، ما خلوا لا مميجة ولا مشكاب ولا خاشوقة ولا غضارة دعوسوهم في الحوي..ما حقلوا شي يبوقوه لكن يرميهم الله في ايد ما ترحمهم، وسلط الله عليهم ناس سطاوي وعساهم انشاء الله ما ليهم في الأرض مقعد ولا في السماء مصعد مايتفرصخوا منهم انشاء الله جاه هالمغربية حوايج الله المقضية. والفشالة ديك الليلة الحوي ما نحست خميته،ويش هالخجالة وياهم،أني عاد يوم شفتهم هالشكل مرشقت في افيابي من الخوف وقمت وانخشيت في الأدب لا يدُوُروا عليِّ إيه..يمقلوا اعيوني بخاشوقة ولا شي وأني بعد إلا خاخونوه...وعاد قعدت اشوي وإلا داك الحنين فرصخنا الله منه..قمت عاد شرفت من لدريشة وإلا الحوي شعرور قلت طاح حضكم يالنحيسين.عاد خفت اطلع أخمه ويجوا ليَ يخلبوني واتقاشر على روحي قلت عاد أخليه لباجر ونوبة وحدة أسوي ليَِ شبة عن الزهقة، زهقوني خراب لمدن..قلت با هيد شوي أنام ، ما قدرت فايح افادي على لماعين. وأني بعد ما ليَِ زاغر أشوف الحوي ولماعين فيه نفرة. عاد غفت عيوني وإلا الأحلام من كل صوب..إيه
عاد ما ضحضحت الدنيا وقمت للحوي وإلا صلوات على محمد وآل محمد الحوي يرهش رهيش ولماعين معدلة هذا معجز دا معجز. عاد يوم قلت للناس وإلا الركاض يركض يستحمدوا ليَِ بالسلامة ويتباركوا بملفعي ما أني في دنيا أني داك اليوم ..

هذاني با وصيّ عليكم ولا أوصي عليكم بشر، كل من يقرأ هالورقة يكتبها أربعين مرة وهوه مفصّخْ. ويقسم عشر امنهم على شياب متحرولة أركبهم وعشر فانين على شياب كريمين عين..إيه ، وعشر اضباع فقمان وعشر اضباع فانين كرفان..وإلا ما يصير ليكم زين موا تقولوا تقاشرت عليكم إيه..

انتهى...


مناسبة المعجزة:
هي طبعاً قصة ألفها أحدهم سنة 1996م لتلقي بالضوء على ظاهرة كانت شائعة بالمجتمع وهي كل يوم وقصة معجزة جديدة من هنا وهناك ..
حتى أنني أذكر أيام ما كنا صغننين كانوا الناس يكتبوها باليد... وبعدين مع التطور صارت طباعة ورسائل جوال وإيميلات...

هههههه

مشكوور اخوووي ع القصة حلووه

والله يعطيك الف عافيه

تحيااتي